Pepsideild karla | Björgvin og Kristinn til liðs við KR

Sóknarmaðurinn Björgvin Stefánsson og bakvörðurinn Kristinn Jónsson voru kynntir sem nýir leikmenn KR á fréttamannafundi hjá félaginu í dag. Báðir skrifuðu undir samninga út tímabilið 2020. Frá þessu er greint á heimasíðu KR.

Í sumar var Björgvin næstmarkahæstur í Inkasso-deildinni með 14 mörk í 19 leikjum en eftir sumarið tilkynnti hann Haukum að hann stefndi á að spila í Pepsideildinni næsta tímabil.
Í fyrra lék hann í Pepsideildinni, fyrst með Val þar sem hann fann sig ekki. Á miðju sumri fór hann í Þrótt en liðið féll í Inkasso-deildina og skoraði hann tvö mörk í tíu leikjum.

Kristinn kemur frá Breiðabliki en áður lék hann í Noregi. Hinn 27 ára gamli Kristinn er uppalinn hjá Breiðabliki og hefur spilað fjölmarga leiki með félaginu. Kristinn á að baki 8 A-landsleiki og alls 32 leiki með yngri landsliðum Íslands.

Einnig skrifuðu KR ingarnir Óskar Örn Hauksson og Skúli Jón Friðgeirsson undir nýja samninga.

Deila