EM 2018 | Ísland mætir Japan í Laugardalshöll 3.janúar | Forsala er hafin

Íslenska karlalandsliðið í handknattleik hefur sem kunnugt er leik á Evrópumótinu í Króatíu þann 12.janúar næstkomandi og lokaundurbúningur liðsins fyrir EM er hafinn. Nú hefur verið staðfest að síðasti heimaleikur liðsins fyrir utanför er gegn Degi Sigurðssyni og lærisveinum hans í japanska landsliðinu þann 3.janúar. Dagur stýrði Þjóðverjum til Evrópumeistaratignar í Póllandi fyrir tveimur árum og tók við japanska landsliðinu fyrir tæpu ári.

Leikurinn gegn Japan hefst klukkan 19.30 miðvikudaginn 3.janúar og íslenska landsliðið heldur að honum loknum til Þýskalands og mætir heimamönnum í tveimur síðustu leikjum sínum fyrir EM, 5. og 7.janúar. Ísland leikur í A-riðli EM í Split og mætir Svíum 12.janúar, Króötum 14.janúar og Serbum 16.janúar.

Í fréttatilkynningu HSÍ vegna leiksins gegn Japönum segir m.a.:
Geir Sveinsson er að móta ungt og spennandi lið í bland við reynslubolta eins og fyrirliðann Guðjón Val Sigurðsson og Aron Pálmarsson, sem nýlega gekk til liðs við stórlið Barcelona.
„Framundan eru mikilvægir leikir í undirbúningi fyrir EM, síðasti heimaleikurinn okkar verður á móti Japan 3. janúar. Þann tíma sem við höfum saman munum við nýta til að skerpa á áhersluatriðum í sóknar- og varnarleik sem og að fara yfir ákveðin atriði sem gætu komið upp á EM. Það skemmir ekki fyrir að við stjórnvölinn hjá Japan er góður vinur minn, Dagur Sigurðsson, sem er nýtekinn við liðinu og það verður spennandi að sjá hvað þeir hafa fram að færa. En fyrst og fremst erum við að hugsa um okkur og að undirbúa okkur eins vel og hægt er fyrir EM í Króatíu“ sagði Geir Sveinsson þegar við slógum á þráðinn til hans.

Forsala miða á Japanleikinn er hafin á Tix.is.

Deila